5834 банкаўскія пераводы прыпынілі ў Беларусі за год

Летась у Беларусі былі прыпыненыя 5834 падазроныя банкаўскія пераводы. Гэта вынік працы аўтаматычнай сістэмы абмену інфармацыяй паміж банкамі і сілавымі органамі, піша sb.by.

Сістэма пачала дзейнічаць у сакавіку 2024 года. Яе стваралі дзеля таго, каб спыніць крадзяжы сродкаў з рахункаў грамадзян. У рамках гэтай сістэмы банкі паведамляюць сілавікам пра падазроныя рахункі і транзакцыі, а тыя маюць магчымасць блакаваць рахункі і пераводы.

У Нацбанку кажуць, што агульная сума шкоды, нанесенай ашуканцамі летась, склала 48,8 мільёна рублёў. Ад сакавіка па снежань дзякуючы новаўведзенай сістэме атрымалася прадухіліць крадзеж 5,7 мільёна рублёў.

Паведамляецца, што зламыснікі памянялі сваю тактыку пасля ўводу сістэмы. Скарацілася колькасць асоб, задзейнічаных у вывадзе грошай. скараціліся і ланцужкі рахункаў, па якіх адбываўся вывад — з ранейшых 5-10 рахункаў да 1-2 цяпер.

У МУС заяўляюць, што зламыснікі сталі радзей дамагацца доступу да банкаўскіх рахункаў людзей. Яны сталі часцей звяртацца да махлярскіх спосабаў, вымушаючы пацярпелых самастойна перадаваць грошы.