"Зроблена хранова, шчыра кажучы". Ці ёсць попыт на беларускія ноўтбукі

— Для дызайну, праграмавання, гульняў, то, магчыма, ён не падыдзе. Для вучобы і офіснай работы — гэта цалкам годны ноўтбук.

— А ўмоўны фаташоп ён пацягне?

— Шчыра кажучы, сказаць дакладна не магу, але мне здаецца для фаташопа ён будзе слабаваты.

— А як ён па водгуках?

— Ніводнага наракання не было, і ніводнага звароту ў сэрвісны цэнтр не было.

— Яго часта купляюць?

— Складана сказаць, але ў цэлым рэалізавалі іх дастаткова.

"Тавар беларускай вытворчасці я б купляць не стаў"

У яшчэ адной краме кансультант расказвае, што "людзі ўсё роўна бяруць, нягледзячы на беларускую вытворчасць".

— Яны даволі няблага нашпігаваныя. Напрыклад, у суадносінах цана/прадукцыйнасць — у іх яна самая максімальная. Плюс на ўсіх "Гарызонтах" усталёўваецца ліцэнзійная Windows 11. Па якасці сказаць нічога не магу, у нас па гарантыі іх пакуль яшчэ рамантаваць не прыносілі.

— А вы б параілі ўзяць яго ці які-небудзь аналаг?

— У кожнага чалавека сваё ўспрыняцце. Я наогул такі чалавек, які купляе якасныя рэчы, таму тавар беларускай вытворчасці я б купляць не стаў. 

Калі ў вас абмежаваны бюджэт і патрэбна максімальная прадукцыйнасць, то браць можна. Але калі можаце за тыя ж грошы ці трошкі даражэй купіць больш вядомы брэнд, то лепш купіць больш вядомы.

165 ноўтбукаў за 295 тысяч рублёў

Попыт на ноўтбукі "Гарызонт" ёсць не толькі ў фізічных асоб, але і ў дзяржпрадпрыемстваў. Хоць складана сказаць, ці гэта іх ініцыятыва, ці то ўказка зверху.

Напрыклад, вайсковая часць 01313 з Асіповічаў нядаўна купіла адразу 165 ноўтбукаў "Гарызонт" на суму 295 тысяч рублёў. Барысаўская вайсковая часць таксама вырашыла закупіцца айчыннымі дэвайсамі, але не з такім размахам: узялі тры ноўтбукі за 3600 рублёў.

Прапагандысты з АНТ у 2024 годзе таксама набылі пяць новенькіх беларускіх ноўтбукаў — і аддалі за іх 11100 рублёў.

А якія водгукі ў інтэрнэце?

Каментары ад карыстальнікаў наконт айчыннага ноўтбука розныя. Спачатку пачыталі негатыўныя водгукі.

Многія пакупнікі ўжо пасля некалькіх тыдняў карыстання пачалі заўважаць сур'ёзныя недахопы.

"Праз месяц перастала працаваць вэб-камера, фізічнага ўздзеяння не было. Хутчэй нешта праграмнае, драйверы не дапамаглі".

У тым ліку звярталі ўвагу і на якасць беларускай зборкі.

"Жонка ўпершыню сцерла з закрытага ноўтбука пыл віскознай анучкай і нейкім чынам ухітрылася тканінай зачапіцца і трошкі адагнуць літару "Н" на вечку".

"Зроблена хранова, шчыра кажучы. Маглі палірнуць, неяк заліць гэтыя стыкі. Альбо не рабіць гэтую металічную налепку, цяпер толькі пальцы абразаць".

“На наступны дзень перастаў рэагаваць на кнопку ўключэння, вельмі крыўдна, адпрацаваў гадзіну".

Многія скардзяцца і на слабы акумулятар ноўтбука. У кагосьці праз некалькі тыдняў ён проста перастаў зараджацца.

Ёсць і каментатары, якія гарызонтаўскі ноўтбук хваляць. Часцей за ўсё станоўча пішуць пра цану і дызайн.

"Ноўтбукам задаволены, браў для працы. Матэрыял корпуса прыемны навобмацак, экран вельмі яркі, вугал агляду дабротны. Датычна прадукцыйнасці нараканні адсутнічаюць, спрытна выконвае працоўныя задачы, глюкі і лагі адсутнічаюць. Сістэма астуджэння працуе ціха. Прыемная цана. Падобныя канфігурацыі ад А брэндаў каштуюць значна даражэй".