Жыхарам Жодзіна вярнулі электрычнасць
На электрасетках адбылося аварыйнае адключэнне / t.me/minskenergo/
Жыхарам Жодзіна вярнулі электрычнасць. Раніцай 4 сакавіка там здарылася аварыя. Як паведамлялі энергетыкі, у 11:15 была пашкоджаная кабельная лінія 10 кВ РП "БелАЗ". Праз гэта "адбылося адключэнне аднаго з трох сілкаванняў РП "Водазабор — Паўночная". У частцы горада зніклі электрычнасць і вада.
Аднаўленчымі працамі займалася рамонтная брыгада Барысаўскіх электрасетак. Спачатку ў 12:20 аднавілі электразабеспячэнне водазабору. Пасля гэтага некалькі гадзін "вярталі" святло частцы гараджан.
"Электразабеспячэнне ўсіх спажыўцоў горада Жодзіна цалкам адноўлена" ў 14:09, паведаміла "Мінскэнерга".
Падобныя аварыі адбываюцца ў розных рэгіёнах краіны, у тым ліку і ў сталіцы. Інфраструктура патрабуе абнаўлення. Дарэчы, у аўторак Аляксандр Лукашэнка паставіў задачу ўраду па абнаўленні электрасетак.
