Журналістка расказала, як датэлефанавалася Статкевічу на мяжу

Былая галоўная рэдактарка "Новага Часу" Аксана Колб здолела датэлефанавацца да палітвязня Мікалая Статкевіча, калі ён 11 верасня быў на беларуска-літоўскай мяжы. У гутарцы з Deutsche Welle яна расказала, як угаворвала Статкевіча ехаць у Літву.

Колб кажа, што ціснула на палітвязня, гаворачы пра пачуцці яго жонкі.

"Я паспрабавала яго ўгаварыць [з'ехаць у Літву]. За некаторыя рэчы мне цяпер сорамна, таму што, я думаю, я рабіла яму балюча, калі спрабавала сказаць, дакладней, націснуць на тое, што адчувае Марына. Ён і так гэта ўсё ведаў, я разумею, як яму было балюча чуць гэта яшчэ раз. Казалі каля дзевяці хвілін", — згадвае журналістка.

Паводле яе, палітык расказаў, што ў зняволенні перанёс інфаркт. Аднак голас яго гучаў бадзёра, кажа Колб: "Я не пачула наогул ніякіх зменаў, я іх бачыла на камеру, як ён схуднеў, як ён згорбіўся. Але па голасе гэтага абсалютна няма. Такі ж, як звычайна".

Яна згадвае, што Статкевіч сказаў ёй: "Калі цяпер я паддамся на гэта, калі я прыму іх умовы, то, значыць, усё маё жыццё сышло проста дарэмна".

Пры гэтым ён разумеў, што яго вяртанне ў Беларусь азначае зноў турму. Таму Статкевіч папрасіў: "Хопіць мяне шантажаваць, у мяне не так шмат часу, я хачу падыхаць гэтым паветрам, палюбавацца на дрэвы".

11 верасня беларускія ўлады прымусова вывезлі ў Літвы 51 вызваленага вязня, сярод якіх былі і беларусы, і замежнікі. 52-м быў Мікалай Статкевіч, які адмовіўся ад прымусовай дэпартацыі: паводле відавочцаў, ён выбіў нагой дзверы аўтобуса і застаўся на мяжы. Пасля некалькіх гадзін яго ў невядомым кірунку павезлі людзі ў масках. Пазней у СМІ з'явіліся паведамленні, быццам Статкевіча вярнулі ў калонію ў Глыбокім, дзе ён быў перад тым, але афіцыйнага пацвярджэння гэтых вестак няма.