Журналістаў у Кыргызстане затрымалі за "заклікі да масавых беспарадкаў"

29 траўня ў Кыргызстане супрацоўнікі Дзяржаўнага камітэта нацыянальнай бяспекі (ДКНБ) правялі ператрусы і затрыманні супрацоўнікаў недзяржаўнага выдання "Клооп". Пад "зачыстку" трапіл не толькі цяперашнія, але і былыя супрацоўнікі выдання.

Пасля ператрусу аператара выдання Аляксандра Аляксандрава і яго былога калегу Жаамарта Дуулатава затрымалі на двое сутак. Адвакат Бакыт Аўтандзіл расказаў, што іх падазраюць у "закліках да масавых беспарадкаў".

"Мы лічым затрыманні неабгрунтаванымі. Яны не дапускалі адвакатаў, бо не лічылі неабходным пры асабістай гутарцы з падазраванымі дапускаць адвакатаў. Аднак мы лічым гэта грубым парушэннем. Мяне больш за шэсць гадзін не дапускалі да маіх падабаронных", — падкрэсліў адвакат.

Дакладныя абвінавачанні абарона пакуль не ведае, бо следства не дало матэрыялы справы.

Акрамя Дуулатава і Аляксандрава былі затрыманыя дзве дзяўчыны, якія былі ў іх кватэрах, але не маюць дачынення да выдання. Спецслужба затрымала таксама дзвюх журналістак "Клоопа" Айдай Эркебаеву і Зыягул Балот кызы ды былую супрацоўніцу Зару Садыгаліеву. Усіх дзяўчат дапыталі ў якасці сведак па справе і адпусцілі.

Сузаснавальнік "Клоопа" Рынат Тухватшын назваў затрыманні супрацоўнікаў выдання выкраданнямі: "Толькі два чалавекі паспелі паведаміць, што іх затрымліваюць. Пяць чалавек фактычна зніклі. Мы праз знаёмых і адваката знайшлі іх у ДКНБ. Пасля затрымання ніхто з іх не змог звязацца ні са сваякамі, ні з намі".