Жанчыну, затрыманую спасля вяртання з Польшчы, асудзілі на "хатнюю хімію"

Два гады "хатняй хіміі" прызначыў суд Заводскага раёна Мінска 64-гадовай Жанне Вайніловіч.

Жанчыну прызналі вінаватай ва ўдзеле ў паслявыбарчых акцыях пратэсту ў Мінску ў 2020 годзе. Да суда яна два месяцы правяла ў СІЗА, паведамляюць праваабаронцы "Вясны".

Жанну Вайніловіч затрымалі 28 студзеня ў Бабруйску — праз некалькі дзён пасля вяртання з Польшчы.

Праваабаронцы раяць беларусам замежжа перад паездкай у Беларусь сур'ёзна ацэньваць рызыкі і не забываць аб правілах бяспекі. У прватнасці, не варта захоўваць фота з вулічных акцый, "каб не нашкодзіць сабе і іншым удзельнікам пратэстаў". Таксама падставай для пераследу могуць стаць падпіскі ў сацсетках на так званыя "экстрэмісцкія" старонкі ды падабайкі і каментары пад імі.