Беларус апынуўся ў камеры з клапамі пасля сямейнай паездкі за мяжу

Беларус вяртаўся з сямейнай паездкі з-за мяжы і быў затрыманы — нібыта за падабайку на "экстрэмісцкай" старонцы. Тры дні ён правёў у пякельных умовах у брэсцкім ізалятары. Гісторыю расказаў у сацсетках хрысціянскі прапаведнік і актывіст Сяргей Мельянец, які цяпер пражывае ў Польшчы.

Сям'я з чатырма дзецьмі выправілася ў кароткае падарожжа па Еўропе. На зваротным шляху на беларуска-польскай мяжы у памежнікаў узніклі пытанні да бацькі сям'і. У мужчыны была адміністрацыйная судзімасць паводле "народнага" артыкула 23.34 (парушэнне парадку арганізацыі або правядзення масавых мерапрыемстваў) і 19 сутак арышту.

Мужчыну адвялі ў кабінет і запатрабавалі разблакаваць яго тэлефон, а на час праверкі дазволілі схадзіць у прыбіральню. Вярнуўшыся, ён даведаўся, што ў тэлефоне знайшлі падабайку на старонцы "экстрэмісцкага рэсурсу" ў Інстаграме. Ці ставіў гэты лайк сам мужчына, ці яго паставілі памежнікі, сказаць было немагчыма. Беларуса ў кайданках адвезлі ў пастарунак, а пасля допыту і пратаколу — у ІЧУ.

Суседам затрыманага ў камеры аказаўся "бывалы" зняволены, якога затрымалі за супраціў пры арышце. Камеру Мельянец апісвае так: гнілыя драўляныя падлогі і ложкі, дзірка ў падлозе замест прыбіральні, кран з вадой і клапы "ў непрыстойнай колькасці".

"Яны былі ўсюды. На падлозе, на сценах, на столі, у дошках ложка. Не было ніякай магчымасці ад іх схавацца. Нават калі ходзіш туды-сюды — яны зверху сыплюцца. Прысесці можна толькі на край нар. Прытулішся да сценкі – хана", — піша Мельянец.

Супрацоўнікі ізалятара вырашылі правесці дэзінфекцыю ў суседняй камеры: яны сталі прасмажваць яе сценкі агнём. У выніку ўсе клапы рынулі ў камеру затрыманага мужчыны. На трэція суткі ён апынуўся сам-насам з імі і быў увесь пакрыты ўкусамі.

На наступны дзень мужчыну выпусцілі і аддалі рэчы, акрамя тэлефона, а таксама прымусілі падпісаць абавязанне з'явіцца ў суд праз тыдзень. Яму на рукі далі квітанцыю аб аплаце ўтрымання ў ІЧУ, але не выдалі пратакол. На выхадзе яго сустрэла жонка.

"Сустрэла мужа, жахнулася перажытаму ім і адразу кінулася ў краму, каб купіць новую вопратку. Старую — у мяшок. Хто ведае, якія пачвары абгрунтаваліся там", — адзначае Мельянец.

Раней паведамлялася, што толькі за першыя паўтара месяца 2025 года пры вяртанні ў Беларусь былі затрыманыя некалькі дзясяткаў чалавек.