Юрысты, міліцыянеры або аграномы? Як прайшла падача дакументаў у ВНУ

Праўда, конкурс склаўся далёка не на ўсе кірункі. Скажам, на 145 месцаў па спецыяльнасці "Правазнаўства (адміністрацыйна-прававая дзейнасць)" прэтэндуюць 56 чалавек — фактычна залічэнне ва ўсіх у кішэні. У тым ліку міліцыянерам змогуць стаць два абітурыенты, якія набралі ў прамежку 141–145 балаў з 400 магчымых.

З якімі баламі ідуць у настаўнікі

Конкурс склаўся і ў Беларускім дзяржаўным педагагічным універсітэце. Дзесьці, як на псіхалогію, ён дасягае трох чалавек на адно бюджэтнае месца. Але па некаторых кірунках сітуацыя не такая радасная, асабліва для бацькоў будучых школьнікаў.

Так, на 145 бюджэтных месцаў кірунку "Дашкольная адукацыя" прэтэндуюць 146 чалавек. Той адзіны абітурыент, хто не трапіць на бясплатнае, зможа прайсці на платнае, нават нягледзячы на тое, што ў яго менш за 150 балаў з 400. Тлумачым: у гэтага чалавека можа быць 50 балаў за атэстат (гэта значыць, сярэдні бал 5 з дзесяці) і тры сертыфікаты ЦТ па 33 балы. Вось такія могуць быць педагогі.

На 20 месцаў "Сацыяльнай педагогікі" пададзена 25 заяў — таксама паступіць могуць усе з улікам платных месцаў. На 20 жа месцаў "Сацыяльнай работы" — 23 заявы, у выніку шанец таксама ёсць ва ўсіх, як мінімум на платнае.

На "Фізіка і інфарматыка" конкурсу наогул няма: 32 заявы на 36 месцаў. Такім чынам, праз чатыры гады стаць школьным настаўнікам фізікі зможа тэарэтычна і той, хто набраў менш за 155 балаў з 400.

Дыпламатыя і журналістыка — усё?

У БДУ традыцыйна высокія прахадныя балы і конкурсы былі на факультэты міжнародных адносін і журналістыкі. На ФМА высокія балы ў абітурыентаў і сёлета, але конкурс далёкі ад рэкорднага.

Напрыклад, на 20 бюджэтных месцаў спецыяльнасці "Мытная справа" прэтэндуюць 26 чалавек, а на дзесяць на "Лінгвакраіназнаўстве" — 17. Затое адразу чатыры абітурыенты факультэта маюць больш за 390 балаў з 400.

На "Журналістыку" сёлета сумарна набіраюць 70 чалавек, а прэтэндуюць усяго 74. Пры гэтым платнага набору больш не будзе. Шанец атрымаць "корачку" за дзяржаўны кошт будзе і ў абітурыентаў з даволі пасрэднымі баламі.

У цэлым конкурс склаўся, напрыклад, на фізічны факультэт, а вось у Інстытуце тэалогіі зноў будзе недабор. З іншага боку, на "Прыкладную інфарматыку" мехмата конкурс перавышае тры чалавекі на месца.

БДУІР і БДМУ па-ранейшаму ў лідарах

Высокія прахадныя балы звычайна і ў БДУІР — галоўны IT-універсітэт Беларусі. 2022-і, мяркуючы па ўсім, не будзе выключэннем.

Так, на 15 месцаў спецыяльнасці "Інфармацыйныя сістэмы і тэхналогіі (у гульнявой індустрыі)" пададзена 88 заяў, а на 53 па кірунку "Праграмнае забеспячэнне інфармацыйных тэхналогій" — 268.

Ёсць і "менш удалыя" спецыяльнасці, дзе з году ў год конкурс не складваецца. Гаворка пра факультэт радыётэхнікі і электронікі: на 180 бюджэтных месцаў на факультэце пададзена крыху больш за 80 заяў. Аднак недабор тут наўрад ці будзе, бо перайсці на спецыяльнасці факультэта змогуць тыя, хто не пройдзе на бюджэт па іншых кірунках.