Як на тэрыторыі Беларусі з’явіліся копіі рымскіх дынарыяў III стагоддзя

Беларускі археолаг Віталь Сідаровіч, які працуе ў Варшаўскім універсітэце, у сваёй новай працы піша пра з’яўленне на тэрыторыі Беларусі варварскіх копій рымскіх імператарскіх дэнарыяў. На артыкул звярнуў увагу канал “De facto. Беларуская навука”.

На сёння вядома пра 47 такіх знаходак, датаваных III стагоддзем. Археолагі мяркуюць, што такія копіі не мелі эквівалентнай каштоўнасці з сапраўднымі рымскімі срэбнымі дэнарыямі — для іх вытворчасці выкарыстоўвалі сыравіну без строгай селекцыі. 

Магчыма, іх адлівалі, каб забяспечыць мясцовую эканоміку знаёмымі грашыма ў перыяды, калі пастаўкі арыгінальных рымскіх дэнарыяў скараціліся.

Гэтыя манеты сведчаць пра памеры тэрыторыі Вельбарскай культуры, якая існавала на тэрыторыі паўночнай Польшчы і паўднёва-заходняй Беларусі ў рымскі перыяд і асацыюецца з готамі. 

Акрамя таго, яны адлюстроўваюць кантакты з Чарняхоўскай культурай (сучасныя Украіна і Малдова), дзе і вырабляліся гэтыя копіі. Ёсць меркаванне, што і самі вельбарчане маглі займацца іх вытворчасцю.

Цікава, што ў межах Кіеўскай культуры (сучасныя Гомельская і Магілёўская вобласці) падобныя манеты амаль не сустракаюцца.