Клуб “Пагоня” абвясціў конкурс на новы лагатып пасля скандалу ў Літве
Падабенства лагатыпаў выклікала абурэнне літоўскай грамадскасці
Футбольны клуб “Пагоня”, створаны беларусамі ў Варшаве, абвясціў конкурс на новы лагатып. Стары трапіў у скандальную гісторыю праз падабенства з лагатыпам Федэрацыі футбола Літвы.
“Пагоня” выступіла са спецыяльнай заявай, у якой распавяла пра гісторыю першапачатковага лагатыпа.
У паведамленні гаворыцца, што лагатып каманды “створаны на аснове гістарычнага герба “Пагоня” — сімвала Вялікага Княства Літоўскага і дзяржаўнага герба Рэспублікі Беларусь у 1991–1995 гадах”.
“Наш лагатып быў распрацаваны прафесійным дызайнерам перад удзелам каманды ў розыгрышы Кубка Польшчы ў 2024 годзе. Мы атрымалі ўсе неабходныя матэрыялы і дакументы, а дызайнер атрымаў ганарар за сваю працу. Асноўнай ідэяй лагатыпа была адсылка да беларускай традыцыі і нацыянальнага сімвала, а не запазычанне чужой эмблемы. На жаль, тады мы апынуліся ў часовым цэйтноце і не звярнулі ўвагі, што гэты лагатып вельмі нагадвае сімволіку Літоўскай федэрацыі футбола. Мы не мелі намеру пакрыўдзіць літоўскіх заўзятараў, супрацоўнікаў і кіраўніцтва федэрацыі”, — гаворыцца ў паведамленні “Пагоні”.
У клубе падкрэсліваюць, што “Пагоня” — гэта больш, чым лагатып ці герб. Гэта агульная культурная і гістарычная каштоўнасць, якая аб’ядноўвае нашы народы. Менавіта таму мы лічым, што гэтая гісторыя павінна стаць падставай для дыялогу, а не непаразуменняў”.
