Навукоўцы збіраюцца ўзнавіць вонкавае аблічча жанчыны з эліты Тураўскага княства

Беларускія навукоўцы збіраюцца ўзнавіць вонкавае аблічча жанчыны, якая належала да эліты Тураўскага княства XII стагоддзя. Для гэтага выкарыстаюць ДНК-тэхналогіі.

Як паведамляе прэс-служба Інстытута гісторыі НАН Беларусі, з гэтай мэтай група мінскіх навукоўцаў наведала Тураўскі краязнаўчы музей і яго філіял — Археалагічны музей "Экспазіцыя старажытны Тураў". Было паўторна агледжана жаночае пахаванне, захаванае ў 2005 годзе "па метадзе пераносу саркафага".

Падчас антрапалагічных даследаванняў плануецца ўдакладніць біялагічны ўзрост, рост і іншыя марфалагічныя асаблівасці. Для камп'ютарнай рэканструкцыі вонкавага аблічча збіраюцца выкарыстаць гісталагічны метад, лічбавую рэнтгенаграфію.

Тураўскае княства (або Турава-Пінскае княства) узнікла ў канцы Х стагоддзя вакол Турава (цяпер горад у Жыткавіцкім раёне Гомельскай вобласці) на землях дрыгавічоў. Спачатку было ў складзе Кіеўскай дзяржавы, а з сярэдзіны XII ст. стала самастойным. У далейшым княства трапіла ў залежнасць ад галіцка-валынскіх князёў, а пасля ўвайшло ў склад ВКЛ.