"Я гэта з кім трэба ўзгадню". Ці возьмуць на працу, калі падпісваўся за Бабарыку
Ці возьмуць на працу, калі падпісваўся за альтэрнатыўных кандыдатаў у 2020 годзе / sb.by
9 сакавіка BYPOL заявіў, што дзяржарганізацыі атрымалі сакрэтны дазвол прымаць на працу людзей, якія ў 2020-м годзе падпісаліся "не за таго кандыдата". Еўрарадыё вырашыла праверыць, ці дайшоў ужо "сакрэтны дазвол" да працадаўцаў. Пад выглядам чалавека, які не можа знайсці працу праз подпіс, пакінуты пяць гадоў таму, мы патэлефанавалі ў некалькі дзяржаўных устаноў.
За гады, якія прайшлі ад выбараў-2020, дзясяткі тысяч работнікаў былі звольненыя з "воўчым білетам". На прадпрыемствах з'явілася сістэма характарыстык і "супрацоўнікі бяспекі", якія сочаць за тым, каб нелаяльныя рэжыму людзі не патрапілі ў штат.
Цяпер усё мяняецца?
"Падыходзіце, зробім запыт у міліцыю"
Тэлефануем у Мінскую дзіцячую клінічную бальніцу №3 і спрабуем туды ўладкавацца медбратам.
У 2021-м за подпіс за Віктара Бабарыкі адтуль звольнілі вядомага анестэзіёлага-рэаніматолага Максіма Ачарэтняга.
— Падыходзьце з усімі дакументамі, паглядзім. Сэнс ёсць заўсёды, прыносьце пашпарт, дыплом, працоўную, страхавую…
— Проста вельмі даўно не магу знайсці працу... Службы бяспекі пастаянна адмаўляюць.
— Ох... — зноў уздыхае супрацоўніца. — Служба бяспекі ёсць і ў нас. І праверку яна праводзіць.
— Але прыйсці да вас усё роўна варта?
— Прыходзьце з дакументамі ў аддзел кадраў, паглядзім, пагаворым.
"Не падумаўшы, паставілі дзесьці свой подпіс?"
У школах, нелаяльных да рэжыму, вядома, таксама звальнялі. Грукаем у Петрыкаўскую школу і спрабуем уладкавацца настаўнікам фізкультуры.
— То-бок з папярэдняга месца працы вас звольнілі за тое, што вы, не падумаўшы, паставілі дзесьці свой подпіс?
— Так.
— Ведаеце, цяпер настаўнікі вельмі патрэбныя, тут і заробкі паднялі. Нам якраз трэба трэніраваць дзяцей да спаборніцтваў па баскетболе, валейболе…
— Дык вы мяне возьмеце?
— Давайце зробім так: вы патэлефануеце мне праз тыдзень, я гэтае пытанне з кім трэба ўзгадню, і тады будзе відаць, ці варта вам прыходзіць, ці не.
Чаму мы вырашылі праверыць гэтую інфармацыю?
Паводле інфармацыі BYPOL, дазволам прымаць на працу "палітычных" улады спрабуюць вырашыць нястачу кадраў у эканоміцы Беларусі. А яна і праўда неабыякая: за пяць гадоў многіх звольнілі, многія самі звольніліся і з'ехалі за мяжу. А каб утрымаць тых работнікаў, якія засталіся, працадаўцы вымушаныя задзіраць заробкі.
Аднак, мяркуючы па адказах дзяржарганізацый, у якія мы датэлефанаваліся, пра "сакрэтны дазвол" пакуль ніхто не ў курсе.
