Выканаўцам абавязкаў кіраўніка Гродзенскай вобласці прызначылі генерала

Выканаўцам абавязкаў старшыні Гродзенскага аблвыканкама прызначылі генерал-лейтэнанта міліцыі Юрыя Караева. Ён — экс-міністр унутраных спраў, кіраваў міністэрствам падчас падаўлення масавых пратэстаў лета-восені 2020 года. У тым жа годзе стаў памочнікам Лукашэнкі, інспектарам па Гродзеншчыне.

Пра прызначэнне Аляксандр Лукашэнка аб'явіў у панядзелак, калі прызначыў кіраўніка Гродзенскай вобласці, былога міністра аховы здароўя Уладзіміра Караніка віцэ-прэм'ерам, адказным за сацыяльны блок. Каранік сказаў, што Караеў — "выдатная" кандыдатура. "Ну можа і "выдатна", пабачым", — сказаў на гэта Лукашэнка.

Уладзімір Каранік кіраваў Гродзенскай вобласцю з 22 жніўня 2020 года.