У Жодзіне начальніца паштовага аддзялення крала пенсіі
Цяпер яе дзейнасць вывучаюць праваахоўнікі.
Жодзінскі гарадскі аддзел Следчага камітэту расследуе крымінальную справу былой начальніцы аднаго з мясцовых паштовых аддзяленняў. Падставай для крымінальнага пераследу сталі матэрыялы праверкі, якую зладзілі супрацоўнікі аддзела па барацьбе з эканамічнымі злачынствамі Жодзінскага ГАУС.
Паводле інфармацыі прэс-службы Следчага камітэту, падазраваная цягам года сістэматычна крала грошы, якія былі прызначаныя для выплаты пенсій і дапамогаў мясцовым жыхарам.
Ад дзейнасці начальніцы пошты пацярпела каля 10 чалавек — яны не атрымалі ў належны тэрмін свае пенсіі або атрымалі, але не ў поўным аб’ёме.
Дзеянні падазраванай расцанілі як раскраданне шляхам злоўжывання службовымі паўнамоцтвамі.
Фота: zip.belpost.by
