У Польшчы асудзілі мужчыну, які хацеў расказаць КДБ Беларусі пра агентаў ЦРУ
Польскія спецслужбы, ілюстрацыйнае фота / ABW
Годам пазбаўлення волі пакаралі грамадзяніна Літвы, які хацеў шпіёніць на карысць Камітэта дзяржбяспекі Беларусі. Адпаведны прысуд вынес акруговы суд Беластока, піша MOST.
Мужчына хацеў перадаць у КДБ інфармацыю пра агентаў ЦРУ ў Расіі і Еўропе. Аднак на яго выйшлі супрацоўнікі іншых спецслужбаў, якія назваліся прадстаўнікамі беларускай разведкі. Электронная перапіска доўжылася з 27 лістапада 2024 года па 14 сакавіка 2025 года. Як адзначаюць у польскай пракуратуры, дзеянні літоўца былі скіраваныя на шкоду бяспецы ЗША — саюзніка Польшчы ў NATO.
15 сакавіка 2025 года літоўца затрымалі супрацоўнікі польскага Агенцтва ўнутранай бяспекі. На допытах ён прызнаў віну і растлумачыў свае дзеянні. Гэта дазволіла суду вынесці прысуд без судовага разбіральніцтва.
Прысуд быў вынесены 9 студзеня 2026 года.
