У МУС Беларусі заявілі, што не збівалі расійскага стэндапера

Беларускае Міністэрства ўнутраных спраў выступіла з адмысловай заявай наконт публікацый аб збіцці расійскага стэндапера Арцемія Астаніна.

"Пачынаючы з 19 сакавіка ў дэструктыўных СМІ і інтэрнэт-рэсурсах распаўсюджваецца ілжывая інфармацыя аб прычыненні цялесных пашкоджанняў пры затрыманні і этапаванні беларускімі сілавікамі вядомаму расійскаму стэндаперу. Гэтая інфармацыя не адпавядае рэчаіснасці", — заявіў намеснік міністра ўнутраных спраў Генадзь Казакевіч.

Ён сказаў, што Астаніна затрымалі 17 сакавіка ў Нацыянальным аэрапорце Мінск паводле запыту расійскіх сілавікоў. Потым яго пад канвоем байцоў ГУБАЗіКа вывезлі аўтамабільным транспартам на мяжу з Расіяй і перадалі расійскім сілавікамі.

"Пры затрыманні і прадастаўленні пры этапаванні дадзенага грамадзяніна якой-небудзь фізічнай сілы і іншых недазволеных метадаў да яго не ўжывалася. Беларускія сілавікі дзейнічалі ў поўнай адпаведнасці з нацыянальным заканадаўствам", — паведаміў Казакевіч.

Раней паведамлялася пра затрыманне артыста ў Беларусі 17 сакавіка. Беларускія сілавікі выклалі спярша фота Астаніна з дрэдамі, а пазней — без іх і з мясакруткай на шыі. У такім выглядзе яго перадалі расійскаму боку.

Адвакатка Астаніна з яго словаў перадала, што яго ў Беларусі сілавікі завезлі ў лес, дзе катавалі электрашокерам і збівалі. Лекары пазней дыягнаставалі ў яго пералом пазванка, множныя ранкі і ўдары, а таксама выявілі праблемы з дыхальнай функцыяй і лёгкімі.

Пры гэтым артыст падкрэсліў, што расійскія ўлады яго не чапалі, фізічную сілу не ўжывалі, таму да іх за гэта ён прэтэнзій не мае.