У Мінскай вобласці зачыняць 4 школы і 11 дзіцячых садкоў

— Пасля дэталёвага аналізу сеткі ўстаноў дашкольнай і агульнай сярэдняй адукацыі з перспектывай да 2032 года Галоўным упраўленнем па адукацыі Мінскага аблвыканкама па ўзгадненні з Міністэрствам адукацыі прадугледжваецца вывад з сеткі 20 устаноў: 14 дашкольных і 6 агульнай сярэдняй адукацыі (Барысаўскі, Вілейскі, Клецкі, Лагойскі, Мінскі, Маладзечанскі, Любанскі, Слуцкі, Салігорскі, Старадарожскі, Стоўбцаўскі, Крупскі, Чэрвеньскі, Уздзенскі, Капыльскі раёны), у тым ліку шляхам ліквідацыі 11 дашкольных і 4 устаноў агульнай сярэдняй адукацыі. Яшчэ паўдзясятка ўстаноў адукацыі будуць рэарганізаваны шляхам далучэння адна да адной, — падзяліўся планамі Мікалай Башко.

— Закране аптымізацыя і сетку цэнтраў творчасці. Да 1 верасня будзе аптымізавана па два цэнтры творчасці ў Бярэзінскім і Салігорскім раёнах. З іншага боку, у вобласці не толькі зачыняюцца, але і адкрываюцца новыя навучальныя ўстановы. Напрыклад, 1 верасня адкрыецца пачатковая школа — дзіцячы сад у Слуцку, — распавёў чыноўнік выданню mlyn.by.