У Магілёве прыпыненая справа па ліквідацыі праваабарончага цэнтра

Яго дырэктар Уладзімір Краўчанка падаў дакументы аб рэгістрацыі новага юрыдычнага адрасу арганізацыі. Цяпер цягам месяца абласное ўпраўленне юстыцыі мусіць зарэгістраваць змены ў Статуце і адклікаць позву з суда, таму што праваабаронцы выправілі парушэнне.

Позва ў суд на ліквідацыю цэнтра была пададзеная пасля таго, як арганізацыя 5 снежня 2014 года пазбавілася арандаванага памяшкання і не магла знайсці новы юрыдычны адрас. Працяглы час цэнтру адмаўлялі розныя арандадаўцы, аднак у выніку знайсці новы офіс усё ж удалося.

“Спроба ліквідаваць МПЦ — гэта палітычная замова, — мяркуе праваабаронца, старшыня праўлення Магілёўскага праваабарончага цэнтра Барыс Бухель. — Пра гэта сведчыць і тое, што нібыта за адны і тыя ж самыя парушэнні, то бок за адсутнасць юрыдычнага адраса, які нам арганізавалі і нашай віны ў гэтым няма, першапачаткова было прыпыненне дзейнасці, а цяпер падалі позву на ліквідацыю арганізацыі. Для іх было поўнай нечаканасцю, што мы знайшлі новы юрыдычны адрас. Тым больш, я спадзяюся, што цяпер гэта такі юрыдычны адрас, дзе арандадаўцу не прымусяць адмовіць нам у прадстаўленні гэтага адраса”.

Барыс Бухель адзначае, што чарговы напад на арганізацыю супаў з блізкімі прэзідэнцкімі выбарамі. Магілёўскі праваабарончы цэнтр кожны раз арганізоўвае незалежнае назіранне за выбарамі.

“Спадзяюся, што мы выйграем гэты працэс. Хаця, я так разумею, сітуацыя дазваляла ісці напралом і задаволіць позву аб ліквідацыі цэнтра, аднак была ўзятая наша заява аб змене юрыдычнага адраса. Відавочна, што калі цяпер змену зарэгіструюць, а падставаў адмовіць тут няма, то будзе адкліканая позва”, — дадае Барыс Бухель.

Нагадаем, што Магілёўскі праваабарончы цэнтр быў зарэгістраваны ў 1998 годзе і з’яўляецца адзінай рэгіянальнай афіцыйна зарэгістраванай арганізацыяй у Беларусі.

МПЦ неаднаразова атрымліваў папярэджанні праз праблемы з юрыдычным адрасам. Увосень упраўленне юстыцыі спрабавала праз суд прыпыніць дзейнасць арганізацыі, але праваабаронцам тады ўдалося вырашыць праблему: яны заключылі дамову арэнды, якая і была неўзабаве скасаваная арандадаўцам.

Cпецыяльна для праграмы Кардыяграма