У Гомельскім і Мазырскім раёнах уначы былі чуваць выбухі. Збівалі “Шахеды”?
Гомельская вобласць ізноў апынулася пад атакай расійскіх "Шахедаў" / Reuters
Ноччу 9 лютага на поўдні Мазырскага раёна быў зафіксаваны выбух прыкладна ў 02:07. Таксама ў Гомелі было чуваць два моцныя глухія выбухі з інтэрвалам 15-20 секунд у 03:26. Пра гэта са спасылкай на ўкраінскія маніторынгавыя каналы піша “Флагшток”.
Выбухам папярэднічаў пачатак масіраванай атакі расійскімі ўдарнымі БПЛА тэрыторыі Украіны. Некалькі дронаў памянялі курс і заляцелі на тэрыторыю Беларусі: у 00:46 — з боку Рэпак, у 01:34 — з боку Славуціча. Яшчэ адзін "Шахед" перасёк мяжу Беларусі прыкладна ў 01:54 і ляцеў у напрамку Нароўлі.
Сігнал ад беспілотніка знік недалёка ад пасёлка Барбароў, што за 8 кіламетраў ад Мазырскага НПЗ.
