У Гомелі былы зэк скраў антыкварыят у пенсіянеркі, якая яго прытуліла

Гомельская пенсіянерка пашкадавала і прытуліла ў сябе 55-гадовага мужчыну, які выйшаў з турмы і застаўся без прытулку. Ён пражыў у жанчыны паўгода і потым скраў у гаспадыні дзесяць антыкварных прадметаў, у тым ліку фотаальбом аб будаўніцтве ў XIX стагоддзі Самара-Залатавустаўскай чыгункі.

Як піша “Советский район”, мужчына прадаў альбом з арыгінальнымі здымкамі 1885-1890 гадоў гомельскаму калекцыянеру за 18 мільёнаў рублёў. Пасля гэтага падазраванага затрымалі, рарытэт давялося перадаць следчым.

Усяго такіх альбомаў у свой час было выпушчана крыху больш за 40, колькі захавалася да нашага часу — невядома. Гамяльчанцы асобнік дастаўся ад сваяка — удзельніка грандыёзнай будоўлі. Акрамя фаліянта, пастаялец скраў спіртное, камінны гадзіннік, статуэткі і фотаапараты.

За крадзеж мужчыне пагражае да 2 гадоў пазбаўлення волі. Раней ён быў асуджаны за забойства і правёў у турме 15 гадоў.