У 20 разоў за год вырасла колькасць перарэгістраваных беларускіх аўто ў Літве

Беларускія аўтамабілі ў Літве сталі актыўна перарэгістроўваць пасля ўведзеных абмежаванняў. Колькасць перарэгістрацый вырасла ў дзясяткі разоў.

Толькі за палову студзеня 2025 года перарэгістравана каля ста аўтамабіляў, а за ўвесь леташні студзень іх было толькі пяць — у 20 разоў менш. Такую статыстыку падае LRT са спасылкай на кампанію Regitra.

Ад ліпеня мінулага года ўезд у Літву на аўтамабілях з беларускімі нумарамі дазволены толькі асобам, якія маюць від на жыхарства ў Літве або атрымалі шэнгенскую візу ў Літве. Таксама дзейнічаюць дадатковыя абмежаванні для такіх аўтамабіляў.

Як расказвала Еўрарадыё, з 14 лютага беларусы могуць прыязджаць у Літву на сваіх аўто толькі пры наяўнасці літоўскай візы ці дазволу на жыхарства.

Аўтамабілі з беларускімі нумарамі, не перарэгістраваныя ў Літве, могуць знаходзіцца ў краіне не больш за шэсць месяцаў. Літоўская мытня паведамляе, што ў краіну штодня заязджае каля 400 аўтамабіляў з Беларусі, а выязджае — 450.

Некаторыя літоўскія палітыкі незадаволеныя гэтым памежным аўтамабільным рухам. На думку віцэ-старшыні Камітэта па нацыянальнай бяспецы і абароне Сейма Лаўрынаса Кашчунаса, гэта стварае спрыяльнае асяроддзе для дзеяння разведслужбаў. Кіраўнік гэтага камітэта Гедрымас Яглінскас заяўляе, што змяншэнне колькасці аўтамабіляў з беларускімі нумарамі — важны крок па скарачэнні ўплыву афіцыйнага Мінску.

Дарадца Ціханоўскай Франак Вячорка наадварот мяркуе, што такія абмежавальныя меры найперш удараць не па рэжыме Лукашэнкі, а па яго праціўніках: "Не думаю, што забарона аўтамабільных нумароў сур'ёзна паўплывае на рэжым Лукашэнкі. Але ён закране людзей, якія падтрымліваюць дэмакратычную Беларусь і Украіну. Ведаю, што многія нашы прыхільнікі пацерпяць праз гэтыя пастановы".