Трамп агучыў сваю версію гібелі салдатаў ЗША ў Літве

Прэзідэнт ЗША Дональд Трамп агучыў сваю версію трагедыі ў Літве з амерыканскімі вайскоўцамі. Там з багны на палігоне ў Пабрадзе дасталі гусенічную машыну M88 Hercules і целы трох салдатаў.

На думку Трампа, бронемашына саслізнула ў балота.

"Траіх з іх ужо няма сярод нас, чацвёртага, верагодна, таксама, але гэта пакуль не пацверджана. Гэта быў вельмі цяжкі аўтамабіль, вельмі цяжкі, і, падобна, што бераг гэтага возера абваліўся. Была ноч, было вельмі холадна, шмат лёду. Мусіць, яны саслізнулі, бо гэта вельмі вялікая і цяжкая тэхніка. Хутчэй за ўсё, так і здарылася, яны саслізнулі. Траіх больш няма з намі, а адзін знік", — цытуе Delfi адказ амерыканскага прэзідэнта на пытанне журналіста.

Літоўскія смІ падкрэсліваюць, што хоць уначы ў Літве цяпер і бывае мінусавая тэмпература, аднак лёду няма нават у лясах.

Дзяржсакратар ЗША Марка Рубіа ў сацсетцы Х падзякаваў Літве за высілкі па пошуку амерыканскіх вайскоўцаў.

Трагедыя здарылася ў мінулы аўторак, 25 сакавіка. Гусенічная машына з чатырма амерыканскімі вайскоўцамі знікла падчас вучэнняў у Літве. Тэхніку выявілі ў багне на наступны дзень. Аперацыя па выманні машыны цягнулася некалькі дзён. Дастаць яе ўдалося толькі пад раніцу панядзелка, 31 сакавіка. У машыне знайшлі целы толькі трох зніклых вайскоўцаў.