Сын беларускага фехтавальшчыка падпісаў кантракт з футбольнай топ-камандай ЗША
Станіслаў Лапкес падпісаў кантракт з футбольнай топ-камандай ЗША / columbuscrew.com
18-гадовы брамнік Станіслаў Лапкес падпісаў кантракт з асноўнай футбольнай камандай "Каламбус Кру", якая выступае ў наймацнейшай лізе ЗША — MLS.
Станіслаў — сын вядомага раней беларускага шабліста Дзмітрыя Лапкеса. Хлопец пачынаў займацца футболам у Мінску, а затым пераехаў з сям'ёй у ЗША. Ад 2019 года Станіслаў гуляў у клубнай акадэміі і дублі "Каламбуса". У 2022-м з юнацкай камандай (U-17) ён дайшоў да фіналу MLS NEXT і стаў найлепшым галкіперам турніру. У складзе "Каламбуса-2" хлопец правёў 35 матчаў і дапамог сваёй камандзе двойчы дабрацца да фіналу Усходняй канферэнцыі.
Яго бацька Дзмітрый Лапкес — вядомы фехтавальшчык, удзельнік чатырох Алімпіядаў. На Гульнях у Афінах у 2004 годзе ён заняў чацвёртае месца. А ў 2011-м заваяваў срэбра чэмпіянату свету ў камандным турніры. Пасля жніўня 2020-га Дзмітрый Лапкес падпісаў ліст за свабодныя выбары і супраць гвалту сілавікоў.
"Каламбус Кру" ў 2024-м заняў другое месца ў сваёй канферэнцыі ў рэгулярным чэмпіянаце MLS (яго абагнаў толькі "Інтэр Маямі", за які выступае Ліянэль Месі) і саступіў у першым раўндзе плэй-оф, адзначае "Зеркало". А ў 2008, 2020 і 2023 гадах "Каламбус" заваёўваў першае месца ў фінале плэй-оф.
