Супрацоўнікам сферы гандлю рэкамендуюць надзяваць пілоткі ці бесказыркі
У крамах з'явяцца "элементы рэтра і вайсковага стыляў" / sb.by
Міністэрства антыманапольнага рэгулявання і гандлю Беларусі апублікавала рэкамендацыі для аб'ектаў гандлю, грамадскага харчавання, гандлёвых цэнтраў і аб'ектаў бытавога абслугоўвання на час святкавання 80-годдзя перамогі над Германіяй. Да 10 красавіка аб’екты гандлю і сферы паслуг павінны аформіць уваходы, вітрыны і інтэр'еры ў святочным стылі. Больш таго, ім яшчэ трэба "арганізаваць мерапрыемствы, прысвечаныя гэтаму святу".
Для афармлення МАРГ рэкамендуе не толькі лагатып свята, але і "элементы рэтра і вайсковага стыляў". Адначасова падкрэсліваецца, што "не дапускаецца выкарыстанне ў афармленні пазначаных аб'ектаў экстрэмісцкай сімволікі і атрыбутыкі".
8-10 траўня аб'ектам гандлю і паслуг рэкамендуецца "ўвесці... мараторый на размяшчэнне... камерцыйнай рэкламы". Прапануецца размяшчаць плакаты, відэаплакаты і сацыяльную рэкламу, прысвечаныя святу. У крамах і гандлёвых цэнтрах будуць уключаць песні ваенных гадоў і пра вайну.
Супрацоўнікам сферы гандлю рэкамендуюць надзяваць бутаньеркі "Яблыневы цвет" і элементы вайсковай формы: пілоткі, бесказыркі, фуражкі, стылізаваныя пад вайсковыя ўборы ваенных гадоў.
