Стала вядома, што памяняецца ў рэгуляванні цэн у Беларусі

2 красавіка ўрад падпісаў шостую версію пастановы №713, якая прадугледжвае карэкціроўку сістэмы рэгулявання коштаў. Падрабязнасці зменаў паведаміла прэс-служба Савета міністраў.

Пералік тавараў, цэны на якія рэгулюцца, скарацілі з 331 да 211 пазіцый. Ва ўрадзе заявілі, што ўлічылі неабходнасць падтрымліваць узровень інфляцыі і выключалі з цэнавага рэгулявання тавары нештодзённага попыту або прэміум-класа. Раней такое скарачэнне раскрытыкаваў Лукашэнка.

Для вытворцаў тавараў, цэны на якія рэгулююцца, вызначаецца гранічная норма рэнтабельнасці. Пры яе ўжыванні не патрабуецца ўзгадняць з дзяржорганамі павышэнне коштаў.

Таксама заканадаўча замацавалі пералік выдаткаў, якія забаронена ўключаць у сабекошт.

Таксама ўрад прызначыў адзіную гранічную надбаўку на імпартаваную прадукцыю — незалежна ад таго, колькі звёнаў задзейнічана ў пастаўцы тавару ад мяжы да паліцы.

На бульбу, цыбулю, буракі, моркву, капусты і яблыкі да 1 траўня 2025 года будуць дзейнічаць гранічныя максімальныя цэны, потым у рознічным гандлі будуць дзейнічаць гранічныя надбаўкі.

Таксама з цэнавага рэгулявання прыбралі тавары, якія прадаюць рэзідэнтам Беларусі для далейшага экспарту. Выключаныя і тавары, якія прадаюцца ў стэрыльнай зоне аэрапортаў.

Рэгуляванне цэн было ўведзенае ўвосень 2022 года пастановай урада №713. З тых часоў пастанову некалькі разоў карэктавалі. Таму цяперашні варыянт мае пазнаку №713(6).