Фонд BYSOL выплаціў 31 000 еўра палітвязням, вызваленым 11 верасня

Палітвязням, вызваленым 11 верасня, фонд BYSOL выплаціў 31 000 еўра. Паведамляецца, што разавую выплату ў памеры 1000 еўра атрымаў 31 чалавек, які звярнуўся ў фонд. Грошы прадастаўленыя Міжнародным гуманітарным фондам. Атрымаць такую дапамогу можа кожны палітвязень, які звярнуўся ў BYSOL.

У фондзе кажуць, што працягваецца працэдура легалізацыі вызваленых. На яе таксама патрэбныя грошы: консульскі збор, страхоўка і г.д. Фонд BYSOL выкарыстоўвае для гэтага сродкі з сумы экстранага збору.

Раней паведамлялася, што ў выніку перамоваў з адміністрацыяй Трампа 11 верасня з-за кратаў былі вызваленыя 52 чалавекі, у тым ліку палітвязні. Адзін з вызваленых, Мікалай Статкевіч, адмовіўся прымусова пакідаць радзіму і вярнуўся ў Беларусь. Яго лёс дагэтуль невядомы.

Фонд BYSOL абвясціў экстраны збор на дапамогу вызваленым палітвязням у памеры 50 тысяч еўра. Аднак у выніку было сабрана больш за 100 тысяч еўра.

"Дзякуючы салідарнасці і падтрымцы грамадства палітвязні, высланыя 11 верасня з Беларусі, ужо забяспечаныя мінімальна неабходным. Цяпер мы можам засяродзіцца на сістэмнай дапамозе ў рамках нашага вялікага збору. Мы аб'яўляем пра штомесячную фінансавую падтрымку тэрмінам на тры месяцы", — заявілі ў BYSOL.