ЗША спрабуюць не даць авіякампаніям РФ доступ да санкцыйных дэталяў праз РБ

Вашынгтон спрабуе закрыць для расійскіх авіякампаній пастаўкі санкцыйных авіядэталяў праз Беларусь. Менавіта гэтым тлумачыцца забарона на палёты "Боінгаў" кампаніі "Белавія" ў Расію, піша выданне Politico.

Як паведамлялася раней, 11 верасня ў адказ на выхад з-за кратаў 51 вязня ЗША аслабілі санкцыі супраць кампаніі "Белавія". Пазней стала вядома, што "Боінгам" беларускай кампаніі забароненыя палёты ў Расію, Паўночную Карэю, Іран, Сірыю і Кубу, а таксама акупаваныя тэрыторыі Украіны — Крым і так званыя "ЛНР" і "ДНР". Таксама нельга перавозіць тавары, якія могуць падтрымліваць расійскую агрэсію супраць Украіны. Акрамя таго, пад санкцыямі застаўся "Боінг", на якім лятае Лукашэнка.

"Белавія" мае шаснаццаць  самалётаў, прычым дзевяць з іх — "Боінгі".

Як піша Politico, ліст з пералікам абмежаванняў Мінгандлю ЗША накіравала гендырэктару беларускай кампаніі на наступны дзень пасля таго, як адміністрацыя Трампа прыняла пастанову пра зняццё санкцый з "Белавіі".

У беларускай кампаніі на запыт Politico не далі дакладнага адказу, ці будуць спыненыя рэйсы ў Расію і з Расіі. Аднак ужо 15 верасня "Белавія" абвясціла пра 50-адсоткавую зніжку на рэйсы ў Санкт-Пецярбург. Беларускі перавозчык не ўдакладніў, ці будуць у гэтых рэйсах выкарыстоўвацца "Боінгі".

Дарэчы, пасля зняцця санкцый з "Белавіі" Расія папрасіла ІКАО зняць санкцыі з расійскіх авіяперавозчыкаў, уведзеныя пасля пачатку шырокамаштабнай агрэсіі РФ супраць Украіны.