Падчас атакі на Крым пацярпелі і грамадзяне Беларусі
Фарос пасля дронавай атакі / тг-канал "мэра" Ялты
Грамадзяне Беларусі ёсць сярод пацярпелых падчас учорашнай украінскай атакі на Крым. Пра гэта паведаміла ў сваім тг-канале кіраўніца прарасійскай адміністрацыі Ялты Яніна Паўленка.
У МЗС Беларусі пацвердзілі, што двое нашых суграмадзян атрымалі раненні сярэдняй цяжкасці.
Паводле звестак расійскіх уладаў, у выніку ўдару дронамі 21 верасня тры чалавекі загінулі, яшчэ 16 атрымалі раненні.
Пашкоджаныя некалькі аб'ектаў на тэрыторыі санаторыя "Фарос" і будынак школы ў пасёлку — імаверна, менавіта там і адпачывалі пацярпелыя беларусы. Санаторый "Фарос" звязваюць з Федэральнай службай бяспекі Расійскай Федэрацыі.
Паведамленні пра тое, што спрычыніла ахвяры, разыходзяцца. Спярша Мінабароны РФ заявіла, быццам удар быў нанесены адмыслова па курортнай зоне Крыма. Але ў наступным паведамленні вядзецца пра падзенне абломкаў збітага беспілотніка, праз якія адбылося ўзгаранне сухой травы ў раёне Ялты.
