Стала вядома імя аднаго з катаў паэта Міхася Чарота

Ураджэнец Бабруйска Віктар Эмануілавіч Быхоўскі вёў справу беларускага паэта Міхася Чарота. Пра гэта піша канал “Беларускі інстытут публічнай гісторыі”.

Падчас Вялікага тэрору ў 1937–1938 гадах Быхоўскі ўзначальваў сакрэтна-палітычны аддзел НКУС БССР, які займаўся беларускімі нацыяналістамі.

У адным з дакументаў у Архіве актаў новых запісана, што менавіта Быхоўскі “вёў справы на беларускага паэта Чарота і атрымліваў паказанні на "ворагаў народа", былых беларускіх нацыяналістаў і ўдзельнікаў антысавецкай змовы”.

Адзін з калегаў ахарактарызаваў Быхоўскага “як садыста і ліпача, здольнага сфабрыкаваць любую справу”. За катаванні арыштаваных і фальсіфікацыі спраў у 1939 годзе ён сам быў асуджаны на 10 гадоў лагераў.

Міхася Чарота арыштавалі 24 студзеня 1937 года. Пасля шматлікіх допытаў і катаванняў ён прызнаў віну.

Паэта расстралялі ў ноч з 29 на 30 кастрычніка 1937 года разам з іншымі прадстаўнікамі беларускай інтэлігенцыі.

У яго камеры пазней на сцяне знайшлі апошні верш паэта:

“Мяне заціснулі за краты. 

Я прысягаю вам, сябры, 

Мае палі, Мае бары, 

— Кажу вам — я не вінаваты!”