Сабака Джэсі другі дзень чакае гаспадара. Ён загінуў падчас абстрэлу Кіева
Гаспадар сабакі Джэсікі дзяжурыў на стаянцы ў ноч абстрэлу. Ён загінуў, а сабака дагэтуль чакае яго на месцы трагедыі / slidstvo_info
Ахвярамі начной атакі Расіі на Кіеў сталі 23 чалавекі. Сярод іх — мужчына, які ў ноч абстрэлу дзяжурыў на аўтамабільнай стаянцы. Сабака Джэсіка дагэтуль чакае, калі ён вернецца, піша ўкраінскае выданне Slidstvo.info.
"Згарэў на стаянцы. Яго няма. Загінуў. Ён дзяжурыў на стаянцы, і яна з ім тут заўсёды дзяжурыла. Яна тут жыве на стаянцы", — распавяла журналістам мясцовая жыхарка.
Відэа з сабакам, які вые на месцы трагедыі, распаўсюдзілі ўкраінскія тэлеграм-каналы.
Ахвярамі абстрэлу Кіева ў ноч на 28 жніўня сталі мінімум 23 чалавекі, сярод іх чацвёра дзяцей. Яшчэ дзясяткі чалавек атрымалі раненні. Усе загінулыя, за выключэннем аднаго, знаходзіліся ў пяціпавярховым жылым доме. Каля 3 гадзін ночы ў дом трапіў снарад.
