РФ працягвае паглынанне БЧ, але баіцца, што Беларусь "раптам" паверне на Захад

11/10/2024 - 16:56

У Супольнасці чыгуначнікаў Беларусі кажуць, што адбываецца "павольнае, але ўпэўненае паглынанне Беларусі Расіяй"

У Супольнасці чыгуначнікаў Беларусі кажуць, што адбываецца "павольнае, але ўпэўненае паглынанне Беларусі Расіяй" / калаж Улада Рубанава, Еўрарадыё

Беларускай чыгунцы тэрмінова патрэбны мільярд долараў на мадэрнізацыю. Але ва ўмовах падзення аб'ёмаў перавозак гэтыя сумы непад'ёмныя для БЧ, упэўненыя ў Супольнасці чыгуначнікаў Беларусі. І дадаюць, што адзінае месца, дзе можна ўзяць гэтыя грошы — Расія.

"Адбываецца павольнае, але ўпэўненае паглынанне Беларусі Расіяй праз транспартную галіну, — кажуць у Супольнасці. — А выйсця няма".

Мы ўжо расказвалі вам у папярэдніх публікацыях, як РЖД паглынае БЧ, і цяпер сітуацыя толькі пагаршаецца.

На што ў першую чаргу БЧ патрэбныя грошы?

Год таму БЧ і РЖД падпісалі пагадненне. У ім сярод іншага прадугледжваецца план мерапрыемстваў па мадэрнізацыі ўчасткаў інфраструктуры для "асваення перспектыўных аб'ёмаў грузаў, якія перавозяцца ў напрамку партоў Паўночна-Заходняга рэгіёну Расійскай Федэрацыі". Гэта значыць, Расія гатовая выдаткаваць грошы на мадэрнізацыю беларускай чыгуначнай інфраструктуры.

У Супольнасці чыгуначнікаў па просьбе Еўрарадыё назвалі некалькі праектаў, на рэалізацыю якіх, на іх думку, Беларусі асабліва патрэбныя грошы.

Першы — мадэрнізацыя цягавага рухомага саставу. Чыгуначнікі кажуць лаканічна: там усё кепска — ёсць экзэмпляры 60-х гадоў выпуску. У асноўным гаворка пра грузавыя саставы, але і пасажырскіх гэта таксама тычыцца. Напрыклад, электрацягнікі ЭР9, пасажырскія лакаматывы ЧС4, якія маюцца на балансе БЧ — вельмі старыя.

— Для некаторых машын ужо проста нельга працягнуць тэрмін службы, іх трэба проста спісваць, — кажуць чыгуначнікі.

Калі не абнавіць цягавы рухомы састаў БЧ, гэта пагражае як выхадам цягнікоў са строю — і такім чынам зніжэннем аб'ёмаў грузаперавозак, так і проста аварыйнымі сітуацыямі. Акрамя як у Расіі ўзяць цягавы рухомы састаў няма дзе. Нават Кітай адмовіўся працаваць з Беларуссю з акуратнай фармулёўкай — "да нармалізацыі сітуацыі". А работа з Расіяй — гэта фінансавая кабала, кажуць суразмоўцы Еўрарадыё. Па-першае, расійскія электравозы даражэйшыя. Па-другое, гэта пагаршае фінансавую залежнасць ад Расіі.

Яшчэ адзін праект, на які тэрмінова патрэбныя грошы — мадэрнізацыя кантактнай сеткі на некаторых участках і мадэрнізацыя цягавых падстанцый.

Электрарухомы састаў павінны сілкавацца энергіяй, а для гэтага патрэбная стабільная падача электраэнергіі ў провад, нацягнуты над сеткамі.

Калі гэтую сетку не мадэрнізаваць, рана ці позна гэта адаб'ецца і на аб'ёме груза- і пасажырскіх перавозак.

"Сапраўды, гэта важныя для Беларусі праекты. Але калі яны будуць рэалізоўвацца выключна за расійскія грошы, гэта будзе пагражаць стратай фінансавай незалежнасці", — кажуць у Супольнасці.

Яшчэ адзін важны праект — будаўніцтва другога пуці так званага паўднёвага абыходу Мінска. Гэты праект дазволіў бы цягнікам не заязджаць на станцыю Мінск-Сартавальны — гэта моцна скараціла б час у дарозе. У асноўным гэты праект патрэбны для таго, каб паскорыць экспарт грузаў і канкрэтна калійных угнаенняў.

Чаго баіцца Расія?

Беларусь і Расія ўжо падпісалі пагадненне, паводле якога Беларусь гарантуе, што нават у выпадку пацяплення стасункаў з Захадам будзе правозіць гарантаваны аб'ём грузаў праз расійскія парты, расказваюць у Супольнасці.

З аднаго боку, Расіі выгадна яшчэ больш "закабаліць" Беларусь. З іншага, там не вельмі хочуць выдзяляць на БЧ такія сумы. У Супольнасці чыгуначнікаў са спасылкай на ўласныя крыніцы кажуць, што ў расійскім урадзе баяцца, што Беларусь атрымае грошы і... развернецца на Захад.

І тады Беларусь вернецца ў парты Латвіі і Літвы, а Расія ўкладзе шмат сродкаў у мадэрнізацыю беларускай чыгуначнай інфраструктуры і застанецца ні з чым.

Але ці можа наступіць такі пункт невяртання, калі Беларусі будзе ўжо нявыгадна вяртацца ў еўрапейскія парты? У Супольнасці чыгуначнікаў адказваюць — не, вяртанне заўсёды будзе выгадным.

— У доўгатэрміновай перспектыве балтыйскія парты для Беларусі заўсёды будуць зручнейшымі, — падсумоўваюць у Супольнасці.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.