Рэжым у Беларусі хавае маштабы хатняга гвалту. Ценявая справаздача ў ААН

У Беларусі не выконваюцца базавыя правы ахвяр хатняга гвалту, а ўлады больш занятыя палітычнымі рэпрэсіямі, чым абаронай жанчын і іншых уразлівых груп. Гэта галоўная выснова справаздачы для ААН аб дыскрымінацыі жанчын, прадстаўленай кааліцыяй арганізацый, якія дапамагаюць у сітуацыі хатняга гвалту. Мерапрыемства праходзіць у гэтыя дні ў Жэневе ў межах сесіі Камітэта ААН. Варта адзначыць, што ценявы даклад быў адным з пяці ценявых справаздач, прадстаўленых рознымі ініцыятывамі. 

Аўтары справаздачы нагадваюць, што ў краіне ліквідаваныя ўсе НДА, якія аказвалі дапамогу пацярпелым. Дзяржаўныя крызісныя цэнтры не даюць спецыялізаванай дапамогі, а праваахоўныя органы ў некаторых выпадках пагражаюць жанчынам адабраннем дзяцей, калі яны спрабуюць атрымаць абарону.

Што было ў справаздачы афіцыйнага Мінска

Сваю справаздачу на сесіі ААН зрабіў і афіцыйны Мінск. У дакуменце, які агучыла пастаянная прадстаўніца Беларусі ў ААН Ларыса Бельская, акцэнт зроблены на прагрэсе краіны ў галіне гендарнай роўнасці, дасягненнях у сферы адукацыі, аховы здароўя і занятасці жанчын.

Падкрэсліваецца падтрымка жанчын у бізнесе і палітыцы, увядзенне бацькоўскага адпачынку. Хатняму гвалту адведзена мінімальная ўвага, а стварэнне “крызісных пакояў” і прафілактычных праграм падаецца як паспяховыя ініцыятывы.

Як бачна, можна назіраць абсалютнае разыходжанне фокусаў. Афіцыйная справаздача паказвае Беларусь у выгадным святле на міжнароднай арэне, а ценявая справаздача дэмакратычных сіл прыцягвае ўвагу да рэальных праблем, якія рэжым Лукашэнкі замоўчвае.