Расійскія войскі перадумалі адыходзіць ад мяжы з Украінай
Адвод 15-тысячнай групоўкі, пра які напярэдадні прэзідэнцкіх выбараў ва Украіне заявіў Уладзімір Пуцін, адбыўся не ў поўнай меры.
На палігонах у сумежных з Украінай абласцях застаюцца некалькі тысяч расійскіх вайскоўцаў і значная колькасць баявой тэхнікі. План адводу войскаў перагледжаны з-за таго, што ўзмацнілася антытэрарыстычная аперацыя на паўднёвым усходзе Украіны, паведамляе РБК са спасылкай на крыніцу ў Генштабе.
Паводле звестак NATO, Расія вывела не больш за тысячу вайскоўцаў. Паводле першапачатковай ацэнкі альянсу, на мяжы з Украінай было дыслакавана каля 40 тысяч расійскіх вайскоўцаў.
Па падліках старшыні памежнай службы Украіны Мікалая Літвіна, у найбліжэйшым прымежжы знаходзіцца каля 18-20 тысяч расійскіх вайскоўцаў. Да гэтага можна дадаць велізарную вайсковую групоўку ў Крыме. Агулам, кажа Літвін, 45-60 тысяч чалавек.
24 траўня начальнік Генштаба РФ Валерый Герасімаў заявіў, што адвод войскаў ад украінскай мяжы можа працягнуцца каля 20 дзён. Аднак крыніца РБК у Генштабе паведаміла, што ў сувязі з трагічнымі падзеямі ў Данецку план адводу быў перагледжаны. На палігонах вырашана пакінуць разведвальныя падраздзяленні і вайсковыя часці, дыслакаваныя ў прымежных з Украінай абласцях.
Фота — topwar.ru
