Работнікам жлобінскай фабрыкі прапанавалі грэцца ў абед каля мікрахвалёвак
Супрацоўніца Жлобінскай швейнай фабрыкі на сваім працоўным месцы / t.me/trkgomel
Пасля скаргі работнікаў Жлобінскай швейнай фабрыкі на холад у цэхах туды прыйшла праверка і мясцовыя тэлежурналісты з тэлерадыёкампаніі "Гомель".
Работнікі скардзіліся што тэмпература ў памяшканні павінна быць 21 градус, але не падымаецца вышэй за 10 градусаў цяпла. Апублікавалі яны ў інтэрнэце і відэапацвярджэнне сваіх словаў.
Праверка санэпідслужбы, якая прыехала пасля гэтага, выявіла "нязначныя" парушэнні тэмпературнага рэжыму.
"Устаноўленыя нязначныя адхіленні ад гігіенічнага нарматыву па тэмпературы паветра на працоўных месцах у швейным цэху — на 1-3 градусы. Пры норме 20 тэмпература паветра складае 17-19 градусаў. На сённяшні дзень вызначана тэмпература 18,6−19,4 градуса", — паведаміў у каментары тэлеканалу "Беларусь 4" прадстаўнік абласной санэпідслужбы Ягор Лазарковіч.
Дырэктарка фабрыкі Таццяна Восіпава ў каментары адзначыла, што работнікі маюць два тэхналагічныя перапынкі і абед, каб сагрэцца. Паводле яе, плануецца дадаць яшчэ перапынкі, каб супрацоўнікі маглі грэцца ў "пакоях прыёму ежы", дзе ёсць чайнікі і мікрахвалёўкі.
