Псеўдаэлектрыкі вымагалі ад айцішніка крыптавалюту на мільярд рублёў

Мінскі айцішнік стаў ахвярай заказнога разбою. У яго вымагалі крыптавалюту на вялікую суму, паведамляе прэс-служба Следчага камітэта.

Здарэнне адбылося летась у сярэдзіне жніўня. У кватэру сталічнага айцішніка пазванілі два "электрыкі" і сказалі, што трэба праверыць лічыльнікі.

Псеўдаэлектрыкі начапілі мінчуку кайданкі і сталі патрабаваць у яго крыптавалюту на агульную суму больш за мільярд рублёў. Пры гэтым яму пагражалі пісталетам і электрашокерам, а таксама ін'екцыяй наркатычных сродкаў. Нападнікі катавалі мінчука больш за гадзіну. Потым нападнікі далі яму 24 гадзіны для пераводу крыптавалюты на электронны гаманец і ўцяклі, забраўшы з сабой мабільнік.

Следчыя пачалі крымінальную справу. Яны выявілі, што ў пацярпелага была крыптавалюта, але не ў такіх вялікіх аб'ёмах. У СК прыйшлі да высновы, што напад быў заказным. Планаванне і падрыхтоўка нападу вяліся некалькі месяцаў. Нападнікі прымалі меры каспірацыі і засцярогі, планавалі шляхі адыходу.

"Падчас аператыўна-вышуковых мерапрыемстваў удалося выявіць асобы выканаўцаў заказнога нападу, імі аказаліся грамадзяне Беларусі (56 і 57 гадоў), адзін з якіх з крымінальным мінулым", — заявілі ў СК.

56-гадовага падазраванага затрымалі. Ён прызнаўся ў зробленым і супрацоўнічае са следствам. У прыватнасці, мужчына паказаў, дзе яны выкінулі пнеўматычны пісталет з глушыцелем, а таксама кайданкі.

Другі фігурант справы ўцёк у Польшчу на спадарожных машынах на наступны дзень пасля нападу. Яму абвінавачанне выставілі завочна і абвясцілі ў міжнародны вышук.

Следчыя звярнулі ўвагу, што ў кватэры айцішніка была вялікая сума грошай і дарагая маёмасць. Але нападнікі патрабавалі менавіта крыптавалюту.