Беларусу, у якога скончыўся ДНЖ у Польшчы, заблакавалі крыптакашалёк

Анлайн-банк Revolut заблакаваў доступ да крыптакашалька беларусу, які жыве ў Польшчы апошнія чатыры гады. Сам мужчына пра гэта даведаўся 1 сакавіка 2025 года. У гэты дзень скончыўся тэрмін дзеяння яго дазволу на жыхарства (ДНЖ) у Польшчы.

Дакументы на новую карту пабыту беларус, як піша MOST, падаў яшчэ ў снежні 2024 года, і мае пацвярджэнне. Аднак банк адмовіўся разблакоўваць рахунак. У такой сітуацыі могуць апынуцца многія беларусы.

Доступ грамадзян Беларусі да еўрапейскіх крыптабіржаў быў абмежаваны 16-м пакетам санкцый ЕС. Ён быў уведзены ў лютым, да трэцяй гадавіны пачатку вайны ва Украіне. Гэтыя абмежаванні не закранюць тых, хто мае ДНЖ або грамадзянства краін ЕС.

У банку Revolut, куды звярнуўся беларус, адказалі: "На жаль, праз рэгуляванне ЕС мы вымушаныя абмежаваць доступ да крыптавалютных сэрвісаў для грамадзян Беларусі без дзейснага дазволу на жыхарства". Аднак нашага суайчынніка запэўнілі, што яго актывы застануцца ў бяспецы і стануць даступныя пасля падачы неабходных дакументаў.

Таксама беларусу заблакавалі акаўнты ў анлайн-сэрвісе Binance. Мужчына са здзіўленнем канстатуе, што яго знаёмыя, якія цяпер знаходзяцца ў Беларусі, па-ранейшаму маюць свабодны доступ да сэрвісу.

Ці магчыма разблакаваць рахункі беларусаў, якія знаходзяцца ў працэсе падаўжэння ДНЖ, пакуль няясна: меры ўвялі нядаўна.