Прыязджай з запасам, а то пойдзеш на 2-гі круг. Сітуацыя на мяжы перад выходнымі

Сітуацыя на беларуска-польскай мяжы ў апошнія дні некалькі палепшылася — на піку колькасць машын у электроннай чарзе перавышала 4,6 тыс., цяпер на выезд з Беларусі ў пункце пропуску "Брэст" стаіць крыху больш за 4 тыс. аўто.

Аднак, калі вы зарэгіструецеся ў чарзе зараз, мяжу зможаце перасекчы ў лепшым выпадку праз тыдзень.

Нагадаем, што на пункце пропуску "Брэст" дзейнічае сістэма электроннай чаргі. Не трэба ўвесь тыдзень сядзець у машыне. Неабходна прыехаць на мяжу і зарэгістравацца ў сістэме. Пасля гэтага можна вярнуцца дадому і сачыць за сітуацыяй дыстанцыйна.

Спецыяльны бот дашле вам апавяшчэнне, калі трэба будзе выязджаць да мяжы. Але ў чатах раяць не давяраць боту і выязджаць да мяжы "з запасам".

"Прагноз бота не супадае з рэальнасцю. Бот трапляе з дакладнасцю 6-8 гадзін. Таму лепш прыязджайце з добрым запасам, інакш пойдзеце на другі круг на 8-9 дзён", — раяць вандроўцы адзін аднаму ў тэматычным чаце.