Прэм'ер Польшчы пацвердзіў выбух на чыгунцы
Дональд Туск на месцы выбуху / акаўнт Туска ў сацсетцы Х
Прэм'ер-міністр Польшчы Дональд Туск пацвердзіў, што чыгунка на лініі Варшава-Люблін пашкоджана ў выніку дыверсіі. Пра гэта кіраўнік польскага ўрада напісаў у сацсетцы Х:
"На жаль, найгоршыя падазрэнні пацвердзіліся. На лініі Варшава — Люблін (вёска Міка) адбыўся акт сабатажу. Выбуховае прыстасаванне здэтанавала і разбурыла чыгуначнае палатно. На месцы здарэння працуюць экстраныя службы і пракуратура. Пашкоджанні таксама зафіксаваныя на гэтай жа лініі, бліжэй да Любліна".
Пра пашкоджанне шляху ў раёне Мікі стала вядома зранку ў нядзелю, 16 лістапада. Машыніст цягніка мясцовай лініі падчас руху на малой хуткасці ўбачыў, што з рэйкі вырваны кавалак. Як пішуць СМІ, перад гэтым мясцовыя жыхары чулі гук выбуху, паліцыя выязджала па выкліку, але тады нічога не выявіла.
