Прайшло паўгода са знікнення Анжалікі Мельнікавай
Анжаліка Мельнікава / Еўрарадыё
Прайшло паўгода са знікнення Анжалікі Мельнікавай. Дзе знаходзіцца цяпер ужо экс-спікерка Каардынацыйнай рады — дагэтуль невядома.
Апошні раз Мельнікава выходзіла на сувязь з дэпутатамі КР 21 сакавіка. Яе дзеці разам з мужам знайшліся ў Беларусі. Сама яна таксама пакінула тэрыторыю Еўрасаюза — спярша паляцела з Польшчы ў Вялікабрытанію, пасля — на Шры-Ланку, пасля — ў Аб'яднаныя Арабскія Эміраты. У Дубаі яе сляды губляюцца.
Расследавальнікі высветлілі, што Мельнікава вандравала па свеце не адна. Яе спадарожнікам быў 32-гадовы Аляксей Лабееў. Ён супрацоўнік беларускіх спецслужбаў, які карыстаўся пашпартам на імя Аляксея Гардзеева. Ці былі яны парай і ў якіх увогуле знаходзіліся стасунках — незразумела.
Разам з Анжалікай Мельнікавай з рахунку яе фонда "Białoruś Liberty" зніклі каля 150 тысяч долараў. У тым ліку $107 тысяч, прызначаныя для Каардынацыйнай рады, і каля $30 тысяч для "Кіберпартызанаў". Грошы выводзіліся часткамі, апошняя транзакцыя датуецца 24-м сакавіка.
