Польшча шмат гадоў жыве ў стане гібрыднай вайны з боку РБ і РФ — Наўроцкі
Караль Наўроцкі і Уладзімір Зяленскі / prezydent.pl
Польшча ўжо шмат гадоў жыве ў стане гібрыднай вайны з Расіяй і Беларуссю. Пра гэта прэзідэнт Польшчы Караль Наўроцкі заявіў падчас сустрэчы з прэзідэнтам Украіны Уладзімірам Зяленскім. 19 снежня ўкраінскі прэзідэнт наведаў з візітам Варшаву.
Як паведамляе portalobronny.se.pl, у гутарцы прэзідэнты абедзвюх краін закранулі пытанне пра пагрозы з боку Беларусі. У тым ліку згадалі і балістычную сістэму "Арэшнік", пра якую Лукашэнка напярэдадні паведаміў, што яна ўжо знаходзіцца ў Беларусі і бліжэйшым часам заступіць на баявое дзяжурства.
Згадаўшы пра гібрыдную вайну, Наўроцкі адзначыў: "Доказ гэтага — міграцыйны ціск на польскую мяжу з боку Беларусі, знішчэнне польскай інфраструктуры, а таксама ўварванне расійскіх беспілотнікаў у польскую паветраную прастору на пачатку верасня".
Паводле яго, Польшча не адзіная краіна Еўрасаюза і NATO, якая адчула такія дзеянні з боку РФ.
