Польшча працягнула забарону на знаходжанне ў памежнай з Беларуссю зоне

Дзеянне часовай забароны на знаходжанне ў некаторых месцах памежнай з Беларуссю зоны працягнецца яшчэ на 90 дзён. Новую пастанову падпісаў міністр унутраных спраў і адміністрацыі Польшчы, яна набудзе моц 10 сакавіка.

Польскія ўлады лічаць, што такія меры гарантуюць бяспеку супрацоўнікаў Памежнай службы, паліцыі і вайскоўцаў, а таксама аблегчаць працы па мадэрнізацыі сцяны і абмяжуюць дзейнасць кантрабандных груповак. Апошнія — перавозяць мігрантаў, якія незаконна пераходзяць мяжу. У 2024 годзе супрацоўнікі Памежнай службы прад'явілі абвінавачанні ў арганізацыі і садзейнічанні нелегальнай міграцыі 597 асобам, у тым ліку, грамадзянам Украіны, Польшчы, Беларусі і Грузіі.

“Буферная зона працуе добра. За амаль 267 дзён працы колькасць спробаў незаконнага перасячэння польска-беларускай мяжы скарацілася прыкладна на 46%. З 13 чэрвеня 2024 года па 6 сакавіка бягучага года было зарэгістравана больш за 12,7 тысячы такіх спроб. У гэты ж перыяд, да ўвядзення зоны, іх было амаль 23,5 тысячы”, — паведамляюць на сайце міністэрства.