Пазняк анансаваў выхад знакавых беларускіх палітвязняў

З нагоды магчымых перамоў паміж Адміністрацыяй прэзідэнта ЗША і Лукашэнкам Зянон Пазняк прыгадаў сваю ініцыятыву з "гуманітарнай справай". На яго думку, яна дала вынікі ўжо ў 2024 годзе, калі ўлады пачалі вызваляць па 20-30 палітвязняў.

"Адміністрацыя прэзідэнта Трампа ацаніла палітычную правільнасць перамоўнага падыходу ва ўмовах гібрыднай вайны і наладзіла кантакты з антыбеларускім рэжымам аб вызваленні закладнікаў", — піша палітык у сацсетках.

Акрамя сваёй ініцыятывы палітык адзначыў правільнасць гуманітарнай справы "Асацыяцыі сваякоў і колішніх палітвязняў", у якую ўваходзяць у тым ліку Святлана Мацкевіч і Таццяна Хоміч.

"Неўзабаве аплачаныя палітычныя гамункулусы, якія крычалі "душыць Беларусь эканамічнымі санкцыямі", пачнуць на хаду пераабувацца", — мяркуе Пазняк.

Таксама ён анансаваў выхад беларускіх палітвязняў і адмену эканамічных санкцый. На яго думку, да гэтага прывядзе палітыка новай амерыканскай адміністрацыі:

"Тое, да чаго няздольны Брусель, імгненна вырашае Вашынгтон. На волю вернуцца знакавыя асобы беларускай культуры — Дзяніс Івашын, Павел Севярынец, Кацярына Андрэева, Павел Мажэйка і іншыя. Будуць вызваленыя ўсе палітвязні. Будуць адменены ўсе антыбеларускія шкодныя для дзяржавы і народа эканамічныя санкцыі".