Святлана Ціханоўская сустрэлася з прадстаўніком адміністрацыі Трампа

Дэмакратычная лідарка Святлана Ціханоўская сустрэлася з прадстаўніком адміністрацыі прэзідэнта ЗША Дональда Трампа падчас Мюнхенскай канферэнцыі па бяспецы.

Гаворка ідзе пра генерала Кіта Келага, які ў адміністрацыі Трампа прызначаны спецпасланнікам па пытаннях Украіны і Расіі. У зоне яго адказнасці — пытанне мірных перамоваў па Украіне.

"Я патлумачыла генералу, што для ўстойлівага міру неабходная прадказальная Беларусь без расійскай вайсковай прысутнасці. Мы дамовіліся працягваць камунікацыю", — пракаментавала Ціханоўская.

Падчас сустрэчы абмяркоўвалася магчымасць прызначэння спецпасланніка па Беларусі, а таксама важнасць уключэння беларускага пытання ў перамовы па Украіне.

Напярэдадні стала вядома, што ў Беларусь прыязджаў амерыканскі дыпламат. Пра гэта паведамляла выданне New York Times са спасылкай на ўласныя крыніцы. Гэта была першая сустрэча Аляксандра Лукашэнкі з высокапастаўленым амерыканскім дыпламатам за 5 год. Пасля сустрэчы з беларускім палітыкам прадстаўнік ЗША накіраваўся ў вёску на мяжы з Літвой, дзе яго чакалі трое зняволеных, сярод якіх было двое беларускіх палітвязняў.