"Паспалітае Рушэнне" прыпыняе сваю дзейнасць
Эмблема "Паспалітага Рушэння" / Паспалітае рушэнне
"Паспалітае Рушэнне" прыпыняе сваю дзейнасць і закрываецца. Аб'яднанне праіснавала амаль тры гады.
"Нашая арганізацыя была ініцыятывай неабыякавых людзей, за нашымі спінамі не было ані дзяржавы, ані нейкіх іншых службаў, структураў і г.д. З часам памылкі назапашваліся, і паўстала пытанне пра тое, што "Паспалітае Рушэнне" патрабуе фундаментальных зменаў, перабудовы і ўжо не можа эфектыўна існаваць у цяперашнім выглядзе", — гаворыцца ў заяве, апублікаванай у тг-канале арганізацыі.
Яе ўдзельнікі абяцаюць хутка паведаміць пра свае планы.
Пра стварэнне "Паспалітага Рушэння" ў верасні 2022 года абвясціў Валерый Сахашчык, тады — прадстаўнік Аб'яднанага пераходнага кабінета па пытаннях абароны. Гэта мела быць нацыянальная спартова-адукацыйная арганізацыя ў структуры АПК.
Неўзабаве Сахашчык адыйшоў ад палітыкі. Праца арганізацыі была непублічнай, на Еўрарадыё ад яе імя выступалі Сяржук Кедышка і Сяргей Бяспалаў. У сярэдзіне 2024 года "Паспалітае Рушэнне" ўзначаліў кіраўнік беларускай прасторы "Робім Разам" Сяргей Бульба.
