Падзе Украіна — падзе і Беларусь. Меркаванне ўкраінскага аглядальніка

11/11/2025 - 18:30

Ён заклікаў разам захаваць украінскую дзяржаўнасць

Ён заклікаў разам захаваць украінскую дзяржаўнасць / NATO

— Розніца паміж Расіяй і Беларуссю ў тым, што Беларусь — гэта акупаваная тэрыторыя, пазбаўленая дзяржаўнай суб’ектнасці, — лічыць украінскі ўдзельнік 4-га Форуму Астрожскіх, які выказаў такое меркаванне падчас экспертнай панэлі "Інфармацыйнае поле і камунікацыя" [Форум працуе па правілах Chatham House. Расказваць пра дыскусіі і выказванні можна, але без указання крыніцы, — Еўрарадыё].

— Бо мы разумеем: калі Расія захоча ажыццявіць нейкі напад на тэрыторыю Украіны з тэрыторыі Беларусі — гэты напад адбудзецца. Калі расійскае кіраўніцтва ўсё ж захоча, каб беларуская армія прыняла ўдзел у гэтым нападзе — яно звернецца да беларускіх вайскоўцаў, якія выканаюць гэты загад. Магчыма, не ўсе.

І вы ў гэтым не вінаватыя, таму што вы такая ж акупаваная тэрыторыя, як Чачня, Татарстан або Бурація. Яны таксама не вінаватыя, што ідуць сюды.

Яны — акупаваная тэрыторыя, — падкрэслівае эксперт.

Аднак беларускія дэмакратычныя сілы цяпер не выкарыстоўваюць гэты тэзіс шырока. На гэта звярнуў увагу спікер у сваім далейшым выступленні.

— Але паколькі вы хочаце, каб вашу дзяржаўнасць успрымалі на роўных з дзяржаўнасцю Украіны або Злучаных Штатаў, — то яна так і ўспрымаецца. І прэзідэнт Злучаных Штатаў звяртаецца да вашага прэзідэнта як да паважанага прэзідэнта Беларусі. А трэба было з самага пачатку казаць, што ў 2020 годзе, па сутнасці, адбылася акупацыя. І гэта тады ўспрымалася б інакш — у свеце, ва Украіне, у ЗША.

Мы б разумелі, што пра вызваленне беларускіх палітвязняў трэба гаварыць з прэзідэнтам Расіі, а не з прэзідэнтам Беларусі.

І, магчыма, удалося б вызваліць значна больш людзей, як бы парадаксальна гэта ні гучала.

У нас не было ілюзій, што можна адарваць Беларусь ад Расіі, а Расію ад Кітая. Бо мы ўвесь час знаходзімся ў гэтых пастках, якія, у прынцыпе, могуць каштаваць нам тут дзяржаўнасці, — папярэджвае аналітык.

Ён падкрэслівае, што страта дзяржаўнасці Украінай прывядзе да аўтаматычнай страты дзяржаўнасці і Беларуссю.

— Бо я зноў чую: Украіна залежыць ад Беларусі. Беларусь залежыць ад Украіны. Мы не залежым ад Беларусі, таму што Беларусь, на шчасце ці на бяду, не з’яўляецца дзяржавай, якая можа хаця б на нешта паўплываць.

Але праўда ў тым, што калі мы страцім дзяржаўнасць, вы таксама яе страціце. Вы станеце дакладна такім жа федэральным акругом, як і мы.

А калі вас цяпер ператвораць у федэральны акруг, гэта проста будзе азначаць, што расійская ўлада зможа яшчэ больш свабодна распараджацца вашай тэрыторыяй, чым распараджаецца сёння, — упэўнены эксперт.

— Таму нам з вамі разам трэба захаваць украінскую дзяржаўнасць, бо толькі тады з’явіцца шанец на канчатковы крах гэтай постсавецкай імперыі і ператварэнне Беларусі ў тое, чым яна з’яўляецца насамрэч — у дэмакратычную еўрапейскую краіну на ўсходзе Еўропы.

У тую краіну, якую мы бачылі ў 2020 годзе, калі высветлілася, што мільёны вашых суайчыннікаў выходзяць з бел-чырвона-белымі сцягамі. Што яны не ўспрымаюць прапаганду Лукашэнкі, што яны цудоўна разумеюць — тая дзяржава, якая была пабудаваная пасля 1994 года, прабачце, гэта не Беларусь. Проста не Беларусь, — падсумоўвае спікер.