Падлеткам у Беларусі афіцыйна дазволяць працаваць кухарамі і друкарамі

У беларускіх падлеткаў з'явіцца значна больш магчымасцяў паспрабаваць свае сілы ва ўпадабанай працы. Мінпрацы падрыхтавала новую рэдакцыю Пераліку работ, на якіх забароненая праца непаўналетніх.

Новы дакумент адкрывае для падлеткаў, якім яшчэ не споўнілася 18 гадоў, доступ да больш як 160 рабочых прафесій.

У прыватнасці, падлеткі змогуць паспрабаваць свае сілы ў вытворчасці прадуктаў харчавання (кулінар, кандытар, кухар), паліграфічнай вытворчасці (карэктар, аператар электроннага набору і вёрсткі, аператар электроннага колерадзялення, друкар), вытворчасці шкла і шкловырабаў (камплектоўшчык шкла і шкловырабаў, разметчык, размалёўвальнік па шкле, фотадрукар на ім), цэлюлозна-папяровай вытворчасці ды іншых.

Таксама ў Мінпрацы плануюць пашырыць спіс лёгкіх работ, на якія можна ўладкоўзваць падлеткаў ва ўзросце з 14 да 16 гадоў.