Па ордары Міжнароднага крымінальнага суда арыштаваны экс-прэзідэнт Філіпінаў

Па ордары Міжнароднага крымінальнага суда арыштаваны экс-прэзідэнт Філіпінаў. Здарылася гэта пасля прызямлення Радрыга Дутэртэ ў міжнародным аэрапорце Манілы. Яго абвінавачваюць у злачынствах супраць чалавечнасці, звязаных з яго жорсткай антынаркатычнай кампаніяй. Ён заахвочваў пазасудовыя расправы і забойствы наркагандляроў, казаў, што забіў траіх наркадзяльцоў, паведамляе "Бі-Бі-Сі".

Падчас прэзідэнцтва Дутэртэ ў 2016-2022 гадах яго вайна з наркотыкамі прывяла да смерці тысяч людзей. Па даных паліцыі загінула каля 7 тысяч чалавек, а праваабаронцы сцвярджаюць, што загінулых магло быць дзясяткі тысяч. ​Каб пазбегнуць расследаванняў МКС, Радрыга Дутэртэ ў 2019-м вывеў Філіпіны з Рымскага статута. Аднак у 2023 годзе суд аднавіў расследаванне. Цяперашні прэзідэнт Філіпінаў Фердынанд Маркас-малодшы выказаў гатоўнасць супрацоўнічаць з Міжнародным крымінальным судом у пытанні арышту Дутэртэ.

Экс-прэзідэнта арыштавалі пасля прыбыцця з Ганконга. Яго адвакаты назвалі арышт незаконным.