“Нёман” прайграў “Рая Вальекана” і пакідае Лігу канферэнцый

28 жніўня ў Мадрыдзе гродзенскі “Нёман” прайграў “Рая Вальекана” у матчы ў адказ плэй-оф кваліфікацыі Лігі канферэнцый з лікам 0:4 і пакідае турнір. Першы матч у Венгрыі “Нёман” таксама прайграў з лікам 0:1.

У першым тайме беларускі клуб выглядаў нядрэнна і нават гродзенцы маглі забіць, але мяч пасля ўдару трапіў у перакладзіну.

У сярэдзіне другога тайма іспанцы на працягу дзвюх хвілін забілі два галы, а пад канец сустрэчы яшчэ два, спакойна давёўшы супрацьстаянне да перамогі.

Такім чынам, апошні беларускі клуб у еўракубках пакідае Лігу канферэнцый і засяродзіцца на чэмпіянаце Беларусі.

Дададзім, што на трыбунах “Нёман” падтрымлівалі і беларускія балельшчыкі, якія вывесілі нацыянальныя сцягі.

Еўрапейскі шлях “Нёмана”

Нагадаем, што на сваім шляху гродзенскі клуб прайшоў армянскі “Урарту”, славацкі “Кошыце” і “Клаксвік” з Фарэрскіх астравоў.

Менавіта “Нёман” унёс найбольшы ўклад у табліцу рэйтынгу УЕФА, што дазволіла Беларусі ў сезоне 2026/2027 зноў выставіць чатыры клубы ў еўракубках.

Беларускі клуб заробіць у гэтым сезоне каля паўтара мільёна еўра. Калі б “Нёман” прайшоў іспанскі клуб, то атрымаў бы мінімум 3,94 мільёна еўра.

Гродзенскі клуб дайшоў да раўнду плэй-оф кваліфікацыі Лігі канферэнцый, пачынаючы еўракубкавы шлях з першага тура.