Некалькі вуліц Мінска засталіся без вады праз адключэнне электраэнергіі
Кран, ілюстрацыйнае фота / pixabay.com
5 сакавіка ў 17:14 прыпынілася праца помпавага абсталявання водазабору №5 "Бараўляны". У "Мінскводаканале" гэта патлумачылі адключэннем электраэнергіі ў Мінскіх кабельных сетках.
Адключэнне электрычнасці прывяло да зніжэння ціску на вадаправоднай сетцы. Без вады засталіся дамы ў квартале вуліц Мірашнічэнкі-Сядых-Лагойскі тракт-Гамарніка-Каліноўскага-Цікоцкага-Карбышава.
У Мінгарвыканкаме заяўляюць, што падачу электрычнасці ўжо аднавілі, і ціск у вадаправоднай сетцы таксама аднаўляецца.
Аператыўныя брыгады "Мінскводаканала" працягваюць работы па ліквідацыі магчымых наступстваў, выкліканых адключэннем.
Аналагічная сітуацыя здарылася ў тым жа квартале на мінулым тыдні, напрыканцы лютага. У выніку аварыйнага адключэння электраэнергіі спынілася помпавае абсталяванне водазабору №5 "Бараўляны". Тады прычынай адключэння назвалі абрыў провада на лініі электраперадачы "Мінск Паўночная — Мінск Усходняя".
