Навукоўцы прыдумалі, як адным аналізам крыві праверыцца на 50 відаў рака

Навукоўцы прыдумалі, як адным аналізам крыві выяўляць прыкметы больш як 50 відаў анкалагічных захворванняў. Тэст Galleri, распрацаваны амерыканскай фармкампаніяй Grail, дазваляе выяўляць фрагменты ракавай ДНК, што адарвалася ад пухліны і цыркулюе ў крыві.

У межах даследавання навукоўцы праверылі 25 тысяч жыхароў ЗША і Канады — у аднаго чалавека са ста вынік аказаўся станоўчым. Анкалогія пацвердзілася ў 62% з іх.

Крыніцу рака аналіз вызначаў дакладна ў дзевяці з дзесяці выпадкаў.

Як мяркуюць даследчыкі, у выпадку адабрэння такі аналіз можа “карэнным чынам змяніць” падыходы да скрынінгу рака, бо дапамагае выяўляць многія яго віды на ранняй стадыі. У спалучэнні з ужо прынятымі скрынінгамі раку малочнай залозы, лёгкіх і кішэчніка аналіз павялічыў выяўленне ў сем разоў.

Цяпер праводзіцца трохгадовае даследаванне з удзелам 140 тысяч пацыентаў у Англіі. Вынікі абяцаюць апублікаваць у наступным годзе.